عندي سؤال يادكتور/ يادكتورة

[allarinja]

طبعاً بدل زماان حبوبة حجتني .. ونادواا لي يمه
وعلاج البخرات وبالبركة ..
عندي سؤال ..
ولدي عندو اللوزه الثالثة لمن تلتهب حرارة جسمو بترتفع
وتصل في الرأس ل 39 درجة وشوية هواء ..
الدكتور الأول مصري أداني ليهو كبسولات .. مانفع
التاني لمن شاف الروشته قالي ده منو الدكتور ال..... الأداك دي
قلته ليهو زميلك .. أداني دواء الشراب
والتالت ديل منو الأدوك ال .... برضوا أداني حقن ..
المهم كلهم متفقين العملية ماتتعمل إلا بعد مايتم خمسة سنين
السر في الخمسة سنين حقت ود الأمين دي شنو ماعارف ..
قلته اسأل دكتور عمر خالد بما إنو دكتور وشاعر خمسة سنين
لقيتو مامشترك معانا في المنتدي لكن الحمد لله عندنا دكاترة في المنتدي

[nilequeen]

العزيز اللارنجا سلامة ولدك وان شاء الله ما يشوف شر
بالنسبة لللوزة الثالثة الوظيفة الدفاعية لها ضد الكثير من انواع البكتيريا يجعل الاطباء لايتسرعون في اجراء العملية لها الا عند بلوغ الطفل هذه السن ثم انه في بعض الحا لات يتراجع حجم اللوزة باستخدام الادوية وفي كثير من الحالات يكون مستوي الالتهاب غير عالي وهذا لايحدد بارتفاع درجة الحرارة وحده بل حسب الدرجة الالتهابية وتحدد معمليا. هي عبارة عن تضخم غدة ليمفاوية موجودة في
البلعوم الأنفي الذي يقع في مجرى الهواء
المار خلف الأنف وتحدث فيه ضيقا بدرجات
متفاوتة – وتوجد عند الأطفال من 18 شهرا إلى 14
سنة تضمر أو تختفي بعد ذلك.
*ما هي أعراضها ؟
- شخير مستمر أثناء النوم والاستيقاظ أيضاً.
- يكون التنفس عن طريق الفم (الفم فاتح)
- تكون هناك نخنخة في الكلام.
- صحيان أثناء النوم في الليل لضيق التنفس
- في الحالات الحرجة يكون هناك توقف للتنفس
أثناء النوم ويترتب عليها مضاعفات نقص
الأكسجين – وارتفاع ثاني أكسيد الكربون في
الدم، إذا تكررت تؤدي إلى ارتفاع ضغط الدم
الوريدي في الرئتين ويكون الطفل في حالة –كسل
– أو نعاس – قليل الاستيعاب وقد يؤدي إلى
نقصان في السمع بتكوين سوائل في الأذن الوسطى.
-وباستئصال اللوزة الثالثة تزول أو تتحسن
كثيراً مشاكل السمع إذا لم يكن هناك مشكلة في
العصب السمعي أو الأذن الوسطي أو العظيمات
السمعية.
- اللوزة الثالثة الضخمة تسبب المشاكل آنفا
يجب إزالتها دون تردد
انشاء الله اكون قد اجبت علي سؤالك والف سلامة مجددا

[allarinja]

مادام خالي محمد الحسن خالك معناها أختي الدكتورة نايل كوين ..
كلامك يطمن يديك العافية ..
لكن الحمد لله شخير مافي والسمع عال العال والذكاء فايتني بي كتير
وكان لي أمو مافي أي مقارنة ..
ولدي ماش مني ده بتتضخم لوزتوا وحرارتو بتزيد لمن يزعل خاصة لمن يبكي
او يشرب ماء بارد أو ياكل التلج ..
والأدوية بقت مابتجيب معاهو نتيجة خاصة الكبسولات والشراب يعني حقن بس
لك وافر الشكر والتقدير مع إنو مافي زول بيشكر أختو لكن هروبا من حق الكشف

[بكرى الطيب هدية]

اللارنجــــــــــــا عوافييييييييييي

معقول بس من أول كشف عايز تعالج ولدك ملح وطوالي فتشت لي صلت القرابة
الناس تعبانة تدرس في العلم سنوات طوال عشان تعالج الناس التعابة
وكمان يكسبوا المال الحلال بعد الكشف ووصف الدواء مصحوبا بالسلامة
كشكر ساي امكن براها تعفيك من حق الكشف وترعى حق القرابة
أصلوا الطبيب إنسان يهمو في المقام الأول صحة الناس التعابة
ما بفتش للفلوس بس لراحة النفوس وصحة الناس الغلابة

[allarinja]

اقتباس : المشاركة الأصلية كتبت بواسطة بكرى الطيب هدية [ مشاهدة المشاركة ]

اللارنجــــــــــــا عوافييييييييييي معقول بس من أول كشف عايز تعالج ولدك ملح وطوالي فتشت لي صلت القرابة الناس تعبانة تدرس في العلم سنوات طوال عشان تعالج الناس التعابة وكمان يكسبوا المال الحلال بعد الكشف ووصف الدواء مصحوبا بالسلامة كشكر ساي امكن براها تعفيك من حق الكشف وترعى حق القرابة أصلوا الطبيب إنسان يهمو في المقام الأول صحة الناس التعابة ما بفتش للفلوس بس لراحة النفوس وصحة الناس الغلابة

عوااااااافي البكري وصباحااااتك ..
أول حاجة خالي محمد حسن الفضل رغم أن والدتي من أولاد باعو ..
يعني خالي قلع وحمرة عين ..
( أي حاجة مافيها روح حلال كلام هب النسيماوي )
وإيهاب ده كان مالمدرسة كان لي يوم الليلة أفتش في روحي ..
وودمختار الترابة تكيل خشم ود الإمام كان إتكلم وعادل موجود ..
يعني تأمين وكشف مجاني للأبد ..
التاني ( عام )..
أختي الدكتورة .. نايل كوين
في جدة طلعت موضة جديدة خاصة في الأطفال
يقولوا ليك بعد مايغلبهم العلاج وتقعد ليك اسبوع
( ميت دماغيا ) ..
الحاصل شنو !! ده مرض ولا حراق روح من الدكتور !!!

الثالث ..
ولدي ماش مني كان عمل عملية حقت ( فتاق في الخصية )
بعد فترة الدكتور إتهمو بي فتاق تحت القفص الصدري طوالي
ويتورم خاصة لمن يبكي ..
البكاء ده فيروس جديد أي دكتور يقوليك من البكاء ..
الفتاق ده قصتو شنو مع الأطفال لأني في العملية لقيت كمية من الأطفال
فتاق الخصية ..

معليش يا أختي نايل كوين بس أبو بلاش كتر منو !!

[nilequeen]

الاخ اللاررررنجا ولا يهمك نحن في الخدمة دائمآ
بالنسبة للموت للدماغي فهو حالة مرضية موجودة في كل انحاء العالم وبنسب متفاوتة واسبابه كثيرة ممكن اختصرها بالقول الهبوط الفجائي للدورة الدموية الواصلة لخلايا المخ مما يؤدي لتوقف كل الوظائف الدماغية في حين يظل القلب ينبض بالحياة
تعريفه:

هو التوقف النهائي (توقف اللاعودة) لجميع وظائف المخ متضمنا وظائف جذع المخ . ظهر هذا التعريف عام 1564م عندما قام أحد مشاهير الأطباء في مدريد بأسبانيا بعمل تشريح لجثة أحد النبلاء في عصره أمام تلاميذه بكلية الطب لمعرفة سبب الوفاة وفوجئ الجميع عند فتح القفص الصدري أن القلب لا يزال ينبض أي أن المريض حي لم يمت بعد ، وأجبر الطبيب على ترك المهنة ومغادرة أسبانيا وبعدها زاد الاهتمام بتعريف الوفاة وإعلان الموت الإكلينيكي أو الوفاة الدماغية . ثم زاد الاهتمام في القرن الماضي بهذا التعريف ناتج عن عوامل ثلاثة:

1- التجربة الشهيرة التي قطعت بها رأس الدجاجة عن جسمها وظلت الدجاجة تتحرك وتقف بقلب ينبض وأرجل تتحرك مما يؤكد الحياة في الجسم مستمرة رغم قطع – أو وفاة- الدماغ نهائيا.

2- الأجهزة الحديثة بالرعاية المركزة والأدوية الطبية التي يمكنها المساعدة على الحفاظ على استمرار عمل ووظائف القلب والرئتان ( التنفس والنبض) والأجهزة الداخلية الأخرى كالكلي والكبد رغم وفاة المخ وتوقف جميع وظائفه إكلينيكيا بصورة نهائية.

3- ازدياد الاهتمام بنقل وزراعة الأعضاء من الأشخاص المتوفين دماغيا إلى المرضى لإنقاذ حياتهم مما فتح المجال أمام كثير من الجدال الديني والأخلاقي والاجتماعي والمادي حتى يومنا هذا.

متى يتم تشخيص المريض وفاة دماغية أو موت إكلينيكي:

1- عدم الاستجابة لجميع المؤثرات الخارجية مهما كانت سواء بصرية أو صوتية أو للألم ويفقد التواصل بأى طريقة كانت مع المجتمع حوله.

2- اختفاء جميع الأفعال والانعكاسات الدالة على وظائف المخ وجذع المخ ( أى توقف نهائيا وكليا عن العمل). وعلاماته:-
‌أ- اختفاء حركة حدقة العين.
‌ب- اختفاء حركة العين مع وضع ماء بارد في الأذنين.
‌ج- توقف الأفعال المنعكسة لملامسة القرنية أو جدار الحلق.
‌د- اختفاء جميع الحركات الإرادية أو اللا إرادية من أي نوع.
‌ه- توقف التنفس بل أن هناك اختبار يجري على المريض، وإذا زادت نسبة ثاني أكسد الكربون بالدم عن 60% ولم يحدث استجابة لمراكز التنفس ، هنا يتأكد انتهاء عمل مركز التنفس.
‌و- إذا تجاوز المريض إكلينيكيا هذه النقاط يعتبر متوفي إكلينيكيا
إلا إذا :
1- كان تحت تأثير أي مادة دوائية من أي نوع كمخدر مثلا.
2- درجة حرارة المريض أقل من 32ْ م عند الفحص.
3- المريض لا يعاني قبل الموت الدماغي من صدمة من أي نوع أدت إلى هبوط شديد للدورة الدموية قبل الفحص.

الاختيارات التي تجري للتأكد من الموت الدماغي:

- اختبار تخطيط للمخ يظهر اختفاء كهربية المخ بصورة نهائية.
- اختبار لشرايين المخ يثبت عدم تدفق الدم للمخ.
- الأفعال الانعكاسية المثارة لجذع المخ تبين اختفاءها تماماً.
- هنا حتى لو كان القلب يدق والكلي والكبد وباقي الأعضاء تعمل يعتبر المريض متوفى دماغيا أو ميتا إكلينيكيا ويمكن نقل الأعضاء منه، أما الروح فلا يعلم سرها إلا رب العالمين.

وراجعة انشاء الله للجزء الثاني من السؤال

[allarinja]

اقتباس : المشاركة الأصلية كتبت بواسطة nilequeen [ مشاهدة المشاركة ]

الاخ اللاررررنجا ولا يهمك نحن في الخدمة دائمآ

هسي بتكوركي مالك سامعك أنا وحق الكشف بدفعوا !!!
في ناس تعبانة ماترفعي صوتك في العيادة خلي اللارررررنجا
أختي الصغيرة الدكتورة قبل ماترجعي السؤال الثاني ..
ولدي بخصوص اللوزة الثالثة رقدوهو هسي في المستشفي
لكن المره دي حقن بالوريد ودربات
ودرجة الحرارة تطلع وتنزل بين 38 و39 درجة
وبيرفض المكمدات ..
الحاصل شنو والحل شنو !!!
وحقن الوريد دي لي شنو ومن شنو !!!

[nilequeen]

اللارنجا بصوت واطي سلامته ولدك
ممكن يكون الالتهاب حاد وما ينفع يعطوه دواء بالفم والادوية بالوريد مفعولها اسرع وفي الغالب هي مضاد حيوي قوي اما الدربات فهي للتعويض لانه اكيد ما بياكل ويشرب كويس غايتو كله تخمين بدون سماعة وكشف وبدون قروش
المحيرني ولدك ده موقعه وين من الاعراب اسه في السودان ولا في السعودية؟

[allarinja]

اقتباس : المشاركة الأصلية كتبت بواسطة nilequeen [ مشاهدة المشاركة ]

اللارنجا بصوت واطي سلامته ولدك ممكن يكون الالتهاب حاد وما ينفع يعطوه دواء بالفم والادوية بالوريد مفعولها اسرع وفي الغالب هي مضاد حيوي قوي اما الدربات فهي للتعويض لانه اكيد ما بياكل ويشرب كويس غايتو كله تخمين بدون سماعة وكشف وبدون قروش المحيرني ولدك ده موقعه وين من الاعراب اسه في السودان ولا في السعودية؟

الله يسلمك بي صوت واطي ..
ماتخافي كلنا أخوانك ماسامعك ..
ولدي في السودان عشان الشمس وكده ويبقي لونو برونزي
كل شوية ذليني بي عدم القروش ..
بالجد الف شكر يادكتوره ..
وطبعا عشان أختي من غير شكراً لكن يديك العافية

[allarinja]

دكتورة ..
عندي كسر في الترقوة خالد البصير عمل لي جبيرة
مانفعت مشيت المستشفي عملو لي جبيرة برضوا
لكن جبيرة دكاترة ..
بقيت لاقادر أرقد لا أقيف جاء دكتور مصطفي الطيب ود أمونة عمتي ولا حبوبتي
ما متذكر فكاها وعمل لي جبيرة ..
الحمد لله بقيت كويس لكن بنت غلط وبقي كتفي ناقص 2 سم هسي أطالب
منو بالـ 2 سم الناقصة دي ..
طبعا لو مشيت مسافة طويلة بتعب ولو شلته حاجة تقيلة برضو ..
لكن لو بكيت برتاح ..
سألته دكتور قال لي مستحيل الترقوة تبراء صاح يعني لازم العضم يكون
مخلوف في التاني وماتقولي لي مخلوف يعني شنو ..
أكمل ليك بعد ماتجيبي السماعة وأشيل منك حق الكشف !!